ignatz Male, 33. Madrid, Spain

O bosque dos raposos aforcados, do finlandés Arto Paasilinna, é unha moi interesante novela, chea de situacións estrañas pero que o autor logra facer que semellen cotiás.

O libro conta a historia dun ladrón que, víctima da súa cobiza, decide fuxir ao máis profundo de Laponia para evitar compartir o botín dun roubo cos seus cómplices. Unha vez alá trabará amizade (por chamalo dalgún xeito) cun alcólico oficial do exército que traballará para el no seu exilio lapón. Co tempo deixarán de estar sós e chegarán a formar unha orixinal familia alonxada do resto da civilización, composta por membros tan diversos como unha adorábel anciá que quere manter a súa independencia, dúas putas suecas e un tenro raposiño celoso do gato da anciá.

O bosque dos raposos aforcados é o primeiro título publicado pola nova editorial Rinoceronte, un proxecto moi interesante que pretende ofrecer ao mercado galego un catálogo de traducións de obras estranxeiras similar ao que teñen en lingua española Tusquets ou Anagrama. Por certo, merquei o libro directamente na tenda en liña da editorial e estou moi contento coa atención recibida (e cos gastos de envío de balde tamén :P)